">
- अर्थ सरोकार सम्बाददाता
काठमाडौं । अर्थमन्त्री एवं सरकारका प्रवक्ता डा. युवराज खतिवडाले नेपाल विद्युत् प्राधिकरणको कार्यकारी निर्देशक कुलमान घिसिङलाई सामाजिक सञ्जालले नै नियुक्त गरेको टिप्पणी गरेका छन् । मंगलबार सांझ एकाएक सामाजिक सञ्जालमा सरकारले विद्युत् प्राधिकरणको कार्यकारी निर्देशकमा पुन: कुलमान घिसिङलाई नियुक्त गरेको भन्दै हल्ला फिजिएपछी प्रवक्ता खतिवडाले यस्तो टिप्पणी गरेका हुन् ।
सरकारको नियमित पत्रकार सम्मेलनका क्रममा बिहिबार खतिवडाले सामाजिक सञ्जालले दिएको नियुक्तिका बारेमा सरकारलाई थाहा नहुने बताए । यता घिसिङको पुनः नियुक्तिका विषयमा कुनै प्रस्ताव पनि मन्त्रिपरिषदमा नलगिएको र छलफलसमेत नभएको उनले बताए ।
नियुक्तिबारे हल्ला फैलिएपछि ऊर्जा, जलस्रोत तथा सिँचाइमन्त्री वर्षमान पुनले पुनः नियुक्तिका विषयमा प्रस्ताव नै नलगेको प्रतिक्रिया दिएका थिए । घिसिङको ४ वर्षे कार्यकाल यही भदौ २९ गते पूरा हुँदैछ ।
