- अर्थ सरोकार सम्बाददाता
काठमाडौं । एभरेष्ट बैंकमा कार्यरत दुई जना कर्मचारीमा कोरोना संक्रमण पुष्टी भएको छ । काठमाडौंस्थित लाजिम्पाटमा रहेको मुख्यालयमा कार्यरत दुई जना कर्मचारीमा कोरोना संक्रमण पुष्टि भएको हो। कर्मचारीमा कोरोना पुष्टी भएसंगै सो बैंकको केन्द्रीय कार्यालय दुई दिनका लागि सिल गरिएको छ ।
कोरोना संक्रमित कर्मचारीलाई सरकारी आईशोलेशनमा राखिएको छ भने बाँकी सबै कर्मचारीहरुलाई होम आईशोलेशनमा राखिएको छ । संक्रमितको सम्पर्कमा आएका व्यक्तिहरुको कन्ट्याक ट्रेसिङ गर्ने काम भइरहेको छ ।
त्यसैगरी, सो बैंकको कपिलबस्तु र लुम्बिनी शाखामा कार्यरत कर्मचारीलाई पनि कोरोना भाइरसको संक्रमण भएको छ । एभरेष्ट बैंकका कूल चार जना कर्मचारीमा कोरोना भाइरसको संक्रमण सक्रिय रहेको जनाइएको छ ।
सो बैंकबाट गत शुक्रबार कर्मचारीहरुको नमुना संकलन गरी पीसीआर परीक्षण गर्दा आइतबार दुई जनामा कोरोना संक्रमण देखिएको छ । बैंकको लेखा र एक जना सवारी चालकमा कोरोना भाइरस देखिएको छ । राजधानीभित्रैको बैंकमा कार्यरत कर्मचारीलाई कोरोना संक्रमण पुष्टि भएपछि सिंगो बैंकिङ क्षेत्रमा आतंक मच्चिएको छ ।
