- अर्थ सरोकार सुदूरपश्चिम ब्युरो
अछाम । नेत्र विक्रम चन्द (विप्लव) नेतृत्वको प्रतिबन्धित नेपाल कम्युनिष्ट पार्टी अछामले एनआरएन लघुवित्तका कर्मचारीहरुलाई किस्ता उठाउनबाट रोक लगाएका छन् । जिल्लाको मंगलसेन नगरपालिका वडान. १४ कालागाउमा आफ्ना ग्राहकहरुबाट व्याज र किस्ता उठाईरहेका बेला विप्लवका कार्यकर्ताहरुले लघुवित्तका कर्मचारीहरुलाई पैसा उठाउन नदिएर चेतावनीसहित लखेटेका हुन् ।
विप्लवका कार्यकर्ताले भने यसलाई ‘जनकारवाही’ गरेको भनेका छन् । कोरोना कहरका बीच पनि जनतालाई अफ्ट्यारो परेका बेला महँगो ब्याज उठाएको भन्दै आफुले संस्थालाई कारवाही गरेको उक्त पार्टीका अछाम इन्चार्ज नवीनले बताएका छन्। १८% देखि २०%सम्म व्याज असुल्ने, विभिन्न सेवा शुल्क को नाममा जनता लुट्ने वित्तीय संस्थालाई अझै सच्चिन चेतावनीसमेत दिइएको छ।
केहि समय अगाडी विशेषगरी सुदूरपश्चिम र कर्णाली प्रदेशमा विप्लव कार्यकर्ताहरुको आतंक बढेको छ । केहि समय अगाडीमात्र सल्यानस्थित मुक्तिनाथ बिकास बैंकमा समेत विप्लवका कार्यकर्ताहरुले बम राखेका थिए भने त्यसको ठिक केहि समय अगाडी केहि लघुवित्तका पैसा खोसेर सेवाग्राहीलाई नै बुझाउने कामसमेत भएको थियो ।
