• अर्थ सरोकार सम्बाददाता

डोटी । राष्ट्रिय वाणिज्य बैंक दिपायल शाखामा कार्यरत एक कर्मचारीमा कोरोना भाइरसको संक्रमण पुष्ठि भएपछि यहाँका सबै बैंक तथा बैंकका शाखाहरु पाँच दिनका लागि बन्द गरिएका छन् । 

राष्ट्रिय वाणिज्य बैंकको उक्त शाखामा कार्यरत २३ वर्षीया एक महिला कर्मचारीमा शुक्रबार संक्रमण पोजेटिभ देखाएको थियो । त्यसलगत्तै संक्रमणको जोखिमलाई मध्यनजर गर्दै त्यहाँ रहेका निजी तथा सरकारी सबैं बैंकहरु बन्द गरिएका छन् । आइतबार सूचना टाँस गरी पाँच दिनका लागि बैंकमा कुनै पनि कारोबार नगर्ने जनाएका छन् । 

क्यासियर पदमा कार्यरत महिलामा कोरोना सङ्क्रमण पुष्टि भएपछि अन्य व्यक्तिमा सङ्क्रमण नफैलियोस् भन्दै पाँच दिनका लागि बैंक कारोबार पूर्णरूपमा बन्द गरिएको वाणिज्य बैंक दिपायल शाखाका प्रमुख गणेशबहादुर विष्टले बताउनुभया । उहाँले भन्नुभयो, ‘बैंकको सेवा अतिआवश्यक भएको भएतापनि संक्रमणको जोखिम न्युनिकरणका लागि यो कदम चालेका हौँ ।’