">
- अर्थ सरोकार सम्बाददाता
सुर्खेत । रुकुम पश्चिमका एक लेखापालसहित चार जनालाई प्रहरीले पक्राउ गरेको छ । गाउँपालिकाको पैसा व्यक्तिगत खातामा राखेको पाइएपछि त्रिवेणी गाउँपालिकाका लेखापाल हेमन्त केसीसहित चार जना पक्राउ परेका हुन् । पक्राउ पर्नेमा त्रिवेणी गाउँपालिकाका लेखापाल हेमन्त केसी, उनका भतिजा सुवास केसी, भाइ विकास केसी र अर्का भतिजा भीमसेन केसी रहेका छन्।
उनीहरु राति ९ बजेसम्म बाहिरबाट ताला लगाई कार्यालयमै कागजात मिलाउँदै गरेकोबारे स्थानीयले प्रहरीलाई खबर गरेपछि उनीहरुलाई नियन्त्रणमा लिइएको डीएसपी ठकबहादुर केसीले जानकारी दिए ।
लेखापाल केसीले गत आर्थिक वर्ष २०७६/७७ को बजेटबाट २४ लाख ९२ हजार ३७२ श्रीमती र भतिजा सुवासको खातामा जम्मा गरेका थिए । विभिन्न शीर्षकमा अनाधिकृतरूपमा उनीहरुको खातामा जम्मा भएको सरकारी रकम उनीहरुले फेरि गाउँपालिकाकै खातामा जम्मा गरेका थिए । प्रहरीले उनीहरुलाई कार्यालयबाटै रकमको कागजात मिलाउने क्रममा पक्राउ गरेर जिल्ला ल्याएको छ ।
अहिले जिल्ला प्रशासन कार्यालयले छानविन थालेको प्रजिअ पौडेलले बताए । ‘कार्यालय समय १०–५ हो, तर रातिमा पनि कार्यालयमा आएपछि त्यसको कारण खोजी गरिरहेका छौँ,’ प्रजिअ पौडेलले भने, ‘कर्मचारी मात्र नभई परिवारका सदस्यसमेत कार्यालयमा भटिनुले कुनै रहस्य लक्षित गर्छ । अनुसन्धान भइरहेको छ ।’
