- अर्थ सरोकार सुदूरपश्चिम ब्युरो
धनगढी । पछिल्लो समय धनगढीमा छाडा पशुचौपायाको संख्यामा ह्वात्तै वृद्धी आएको छ । बजारका मुख्य सडकहरुमै अनियन्त्रित तरिकाले पशुचौपायाको संख्यामा वृद्धी हुँदा सडक दुर्घटनाको जोखिम बढेको छ । छाडा पशुचौपायाका कारण सडक दुर्घटना भएको तथ्यहरुपनि देखिँदै आएको छ ।
धनगढीमा छाडा पशुचौपायाका कारण बढ्दै गईरहेको सडक दुर्घटनाको जोखिम न्युनिकरणका लागि मंगलबार जिल्ला ट्राफिक प्रहरी कार्यालयले पशुचौपायाको घाँटीमा लाईट रिफ्लेक्टिङ्ग बेल्ट लगाउने कार्य सम्पन्न गरेको छ । रातीको समयमा सडकमा रहेका छाडा पशुचौपाया नदेखिने कारणले दुर्घटना हुने गरेको छ । सोही समस्यालाई मध्यनजर गर्दै रातीको समयमा पनि सजिलै देख्न सकियोस भनि लाईट रिफ्लेक्टिङ्ग (रातको समयमा टल्किने) बेल्ट बाँधेको जिल्ला ट्राफिक प्रहरी कार्यालय कैलालीका प्रमुख सरोज ठकुराठीले बताउनुभयो ।
धनगढी उपमहानगरपालिका वडा नम्बर ४ स्थित के.बि.अटो पार्टस एण्ड सप्लायर्सका संचालक बिक्रम ऐर ज्युको सहकार्यमा उक्त कार्य गरिएको र आगामी दिनमा पनि यसलाई निरन्तरता दिँदै जाने जिल्ला ट्राफिक प्रहरी कार्यालयले जनाएको छ ।
