• अर्थ सरोकार सम्बाददाता 

काठमाडौं । ६ महिनाअघि सरकारले सिल गरिएको पानी उद्योगबाट निरन्तर उत्पादन र बिक्री भइरहेको  खुलेको छ । बालाजु औद्योगिक क्षेत्रभित्र रहेको त्रिकोण बेभरेज पानी उद्योग सरकारी सिल तोडेर सञ्चालनमा आएको हो । पानी प्रशोधन र जारको गुणस्तरमा कैफियत देखिएपछि विभागले गत फागुनमा कम्पनीको आक्वा ९९ नामको पानी बिक्रीमा रोक लगाएको थियो । 

सोमबार काठमाडौं महानगरपालिकाको उपभोक्ता हित संरक्षण विभागले गरेको अनुगमनमा उद्योगले सिल नखुल्दै नी उत्पादन र बिक्रि गरिरहेको पाइएको हो । उद्योगका सञ्चालक सुरेन्द्र श्रेष्ठले अनुगमन समितिसँग अनुमति लिएरै उद्योग सञ्चालन गरेको दाबी गरेपनि कागज पत्र भने देखाउन नसकेको महानगरले जनाएको छ ।उद्योग तत्कालका लागि बन्द गर्न निर्देशन दिएर उद्योगीलाई कागज पत्रसहित महानगरमा हाजिर हुन अनुगमन समितिले निर्देशन दिएको छ ।