• अर्थ सरोकार सम्बाददाता 

काठमाडौं । कोरोना संक्रमण दिनानुदिन बढेसंगै उपत्यकामा १५ दिन कर्फ्यू आदेश जारी गर्ने भएको छ । उपत्यका नगरपालिका मेयर फोरमले निषेधाज्ञालाई थप कडा बनाउन कर्फ्यु जारी गर्नुपर्ने माग गरेपछि कर्फ्यु लाग्ने निश्चित प्राय भएको हो । मेयर फोरमका सचिव एवं मध्यपुर थिमि नगरपालिकाका मेयर मदनसुन्दर श्रेष्ठले फोरमको भर्चुअल बैठकले उपत्यकाका तीनवटै जिल्ला प्रशासन कार्यालयलाई कर्फ्यू आदेश जारी गर्न सुझाव दिएपछि सबै सीडीओ यसमा सहमत भएका हुन् । 

श्रेष्ठले केही दिन अत्यावश्यक सामग्री किनमेलका लागि सहज बनाइ थप १५ दिन कर्फ्यू आदेश जारी गरे मात्रै कोभिड १९ संक्रमणलाई नियन्त्रणमा लिन सकिने बताएका थिए । उनले १५ दिनसम्म भएको निषेधाज्ञाको अवस्थामा संक्रमण फैलिन नपाएको र अझैपनि मानिसहरु बाहिर निस्कने काम भइराखेकाले यसलाई रोकेर संक्रमणलाई पूर्ण रुपमा नियन्त्रणमा लिन कर्फ्यू नै उत्तम विकल्प भएको बताए । 

उपत्यकाका तीनवटै जिल्लाका प्रमुख जिल्ला अधिकारीहरुको संयुक्त बैठकले आज यसको निर्णय गर्दैछ ।