• अर्थ सरोकार सम्बाददाता 

काठमाडौं । काठमाडौँ उपत्यकामा फुटपाथ तथा ठेलामा हुने व्यापार पूर्णरुपमा बन्द गर्नुपर्ने माग गरिएको छ । शुक्रबार काठमाडौं महानगरपालिका उपप्रमुख हरिप्रभा खड्गीले फुटपाथ तथा ठेलामा हुने व्यापार पूर्णरुपमा बन्द गर्नुपर्ने माग गर्दै जिल्ला प्रशासन कार्यालय काठमाडौंका प्रमुख जिल्ला अधिकारी जनकराज दाहाललाई ध्यानकर्षण पत्र बुझाएकी हुन् ।

खड्कीले ठेला र फुटपाथमा संचालन हुने पसलाई पूर्ण निषेधाज्ञा लगाउनु पर्ने माग राखेकी हुन् । यसो त भदौ २४ गते काठमाडौं उपत्यकाभित्रका तीन जिल्ला प्रमुख जिल्ला अधिकारीहरुको बैठकले जारी निषेधाज्ञालाई खुकुलो बनाउँदै ठेला तथा फुटपाथ पसललाई संचालन गर्न दिने निर्णय गरेको थियो ।

तर यस्ता प्रकृतिका पसललाई संचालनमा ल्याउँदा कोरोना संक्रमण फैलिने र कन्ट्रायक्ट ट्रेसिङमा समस्या देखिने भन्दै रोक लगाउनु पर्ने माग सहितको ध्यानकार्षण पत्र उपमेयरले सीडीओलाई बुझाएकी हुन्।