- अर्थ सरोकार सम्बाददाता
काठमाडौँ । सरकारले शंकर ग्रुपअन्तर्गतको जगदम्बा स्टिलले उत्पादन गरेको जगदम्बा डण्डी बिक्रीमा बन्देज लगाएको छ । उक्त डण्डी गुणस्तरहीन रहेको भन्दै सरकारले बिक्रीमा बन्देज लगाएको हो ।
नेपाल गुणस्तर तथा नापतौल विभागले सो कम्पनीलाई स्पष्टीकरण पत्र लेखेर उत्पादित १६ एमएमको टिएमटी बार फी ५०० रड बिक्रीवितरण नगर्न निर्देशन दिएको हो । विभागका महानिर्देशक विश्वबाबु पुडासैनीले मापदण्ड विपरित र गुणस्तरमा बेवास्ता गरेको पाइएपछि बिक्रीमा रोक लगाउनु परेको बताएका छन् । बजारमा बिक्री गरी पठाईएका रडसमेत फिर्ता ल्याउन भनिएको उनले बताए । गुणस्तरहीन प्रमाणित भएपछि उक्त डण्डी खरिद गरी प्रयोग गरिसकेकाहरुलाई भने तनाव भएको छ ।
विभागले कम्पनीलाई १५ दिनभित्र थप स्पष्टीकरण पेस गर्न पनि निर्देशन दिएको छ। ‘नेपाल गुणस्तर प्रमाण चिह्न ऐन तथा नियमावली २०४० को नियम (१६) अनुसारको कारबाही किन नगर्ने ? कुनै कारण भए १५ दिनभित्र आफ्नो सफाइको सबुत प्रमाण तथा सुधारका लागि सही कार्यसहित विभागमा पेस गर्नू,’ विभागको स्पष्टीकरण पत्रमा उल्लेख छ।
