सुर्खेत । कर्णाली प्रदेशमा थप ५१ जनामा कोरोना संक्रमण पुष्टी भएको छ । कोरोना संक्रमण हुनेमध्ये सल्यानका ३३ जना रहेका छन् भने सुर्खेतका १३ जना, दैलेखका दुईजना, जाजरकोट, रुकुम पश्चिम र उदयपुरका एक/एकजना रहेका छन् ।

सल्यानको बनगाडकुपिण्डे नगरपालिकामा एकैदिन ३३ जनामा संक्रमण देखिएको छ । उनीहरु बनगाडकुपिण्डे नगरपालिका वडा नं. १, २, ३ र ५ का हुन् । संक्रमितमा २ देखि ८ वर्षसम्मका ५ जना बालबालिका छन् ।

प्रदेशभर कोरोना संक्रमितको संख्या २९१४ पुगेको छ । महाशाखाको पछिल्लो तथ्याङ्कअनुसार बुधबार प्रदेशमा थप ३५ जना कोरोनामुक्त भएका छन् । प्रदेशमा हालसम्म कोरोनाको संक्रमणबाट मुक्त हुनेको संख्या २६०५ पुगेको छ।

हालसम्ममा प्रदेशभर ३०३ जना कोरोनाका सक्रिय संक्रमित रहेको महाशाखाले जनाएको छ । कर्णालीमा हालसम्म कोरोनाका कारण ६ जनाको मृत्यु पुष्टि भएको छ ।