विराटनगर । विराटनगरको कोशी अस्पतालको प्रयोगशालाका दुई जना प्राविधिक कर्मचारीमा कोरोना संक्रमण पुष्टी  भएको छ । अस्पतालका मेडिकल सुपरिटेन्डेन डा. चुमनलाल दासका अनुसार पीसीआरका एक र जनरल प्रयोगशालाका एक जना प्राविधिक कर्मचारीमा संक्रमण पुष्टी भएको हो । 

प्राविधिक कर्मचारीमा बुधबार साँझ कोरोना देखिएपछि अस्पतालको पीसीआर परीक्षण प्रभावित बनेको छ । अस्पतालको पीसीआर ल्याबमा १० जना प्राविधिक कर्मचारी खटाइएको थियो । एक जनामा संक्रमण देखिए पनि अरु कर्मचारीले सावधानी अपनाएर काम गरिरहेका छन् । 

यता जनरल प्रयोगशाला भने बन्द गरिएको छ । संक्रमितको ‘कन्ट्याक्ट ट्रेसिङ’का लागि इमरजेन्सी ल्याब खुला राखेर जनरल प्रयोगशाला दुई दिनका लागि बन्द गरिएको छ । हालसम्म कोशी अस्पतालका ३० जना कर्मचारीमा कोरोना संक्रमण पुष्टि भइसकेको छ।