- अर्थ सरोकार सम्बाददाता
काठमाडौँ । आज (बुधबार) देखि मर्चेन्ट बैंकिङहरुले डिजिटल माध्यमबाट ग्राहकहरुलाई सेवा दिने भएका छन् । काठमाडौँ उपत्यकामा पछिल्लो समय कोरोना संक्रमणको बढ्दो अवस्थालाई मध्येनजर गरी मर्चेन्ट बैंकिङहरुले डिजिटल माध्यमबाट ग्राहकहरुलाई सेवा दिने भएका हुन् । यसो त मर्चेन्ट बैंकिङहरुमा कार्यरत कर्मचारीहरुनै संक्रमित हुन थालेपछि आफ्ना कर्मचारी र सेवाग्राहीको दुरी कायमका लागि यस्तो गरिएको हो ।
यता मर्चेन्ट बैंकर संघका अध्यक्ष ध्रुव तिमिल्सिनाले सेवा लिनका लागि ग्राहकहरुलाई सकेसम्म मर्चेन्ट बैंकिङको कार्यालयमा नआई फोन, ई-मेल र अनलाइनबाट सेवा लिन आग्रह गरेका छन् । यद्यपी संघमा आबद्ध २४ वटै मर्चेन्ट बैंकिङका कार्यालय भने खुल्लै हुनेछन् ।
यता हिजो (मंगलबार) मात्रै नबिल इन्भेस्टमेन्ट बैंकिङका १३ कर्मचारीमा कोरोना संक्रमण पुष्टी भएको थियो । संघका अनुसार अर्को सूचना जारी नभएसम्म २४ वटै मर्चेन्ट बैंकिङले भौतिक रुपमा ग्राहकको उपस्थिति विना सेवा प्रदान गर्नेछन् ।
