">
- अर्थ सरोकार सम्बाददाता
काठमाडौँ । आज (बुधबार) बाट ‘मेरो सेयर’ मोबाइल एप सार्वजनिक हुने भएको छ । सीडीएस एन्ड क्लियरिङ लिमिटेड (सीडीएससी) ले ‘मेरो सेयर’ को मोबाइल एप आज बेलुकी सार्वजनिक गर्ने तयारी गरेको हो । सीडीएससीले आधा महिना अर्थात् १५ दिनजति बजारबाट प्रतिक्रिया लिनका लागि उक्त मोबाइल एप सार्वजनिक गर्ने जनाएको छ ।
हाललाई एन्ड्रोइड मोबाइलमा मात्र उपलब्ध हुने एप छिट्टै आईओएस सिस्टमको मोवाइल फोनका लागि पनि तयार गरिने बताइएको छ । हालसम्म मेरो सेयरको सफ्टवेयर वेब बेसमा मात्र रहेको थियो ।
मोवाइल एपमार्फत पनि मेरो सेयरमार्फत गर्न सकिने सबै काम गर्न सकिने बताइएको छ । एपमा आइपिओमा आवेदन दिन, सेयर विक्री पश्चात ट्रान्सफर गर्ने सुविधा उपलब्ध छ । अहिले मेरो सेयर सफ्टवेयरमा देखिएका बिभिन्न समस्या मोबाइल एपमा भने नदेखिने बताइएको छ ।
मोबाइल एपमा सीडीएससीको वेबभर्जनमा रहेको जस्तै लोगो समावेश हुनेछ । प्रयोगकर्ताले युजर नेम र पासवर्ड खुल्नेबित्तिकै हाल ‘मेरो सेयर’मा समावेश भएकै ड्यासबोर्ड खुल्ने बताइएको छ । मोबाइल एपबाट लगानीकर्ताहरुलाई थप सहज हुने विश्वास सीडीएससीको छ।
