- अर्थ सरोकार सम्बाददाता
बुटवल । विद्यालयको शुल्क नतिरेको भन्दै प्रिन्सिपलले एक अभिभावकमाथि निर्घात कुटपिट गरेका छन् । नवलपुरको विनयी त्रिवेणी गाउँपालिका–६, रानीनगरस्थित उज्ज्वल शिशु बोर्डिङका प्रिन्सिपल दीपक कुँवरले नवलपरासी पश्चिम सुस्ता गाउँपालिका–३ पत्थरकलाका कृष्णप्रसाद आचार्यमाथि कुटपिट गरेका हुन् ।
प्रिन्सिपल कुँवरले कुटपिट गर्नेक्रममा लडेर उच्च रक्तचाप र मधुमेहका विरामी आचार्यको खुट्टाको फ्युमर (साप्रा) फ्याक्चर भएको छ । आठ वर्ष पुरानो बक्यौता भुक्तानी नगरेको भन्दै कुँवरले कुटपिट गरेका हुन् । घटनालगत्तै पीडित परिवारले स्थानीय तहमा उजुरी दिँदा राजनीतिक दबाबले उजुरी दर्ता नभएको र भदौ ९ गते मात्रै जिल्ला प्रहरी कार्यालय नवलपरासी (पूर्व) मा उजुरी दर्ता भएको छोरा भरतले जानकारी दिए ।
प्रिन्सिपलले लकडाउनका बेला आठ वर्ष पुरानो बक्यौता शुल्क तिर्न भनी कृष्णप्रसादलाई दबाब दिइरहेका थिए । कृष्णप्रसादका दुई छोरा रामप्रसाद र लक्ष्मणले २०६९ सालमा एसएलसी दिएका थिए । एसएलसी दिएका दुवै छोरा अनुत्तीर्ण भएकाले विद्यालयले शुल्क नमागेको होला भनेर बसेको अवस्थामा चार महिनाअघि मात्र एक्कासी शुल्क तिर्न दबाब दिएको भरतले बताए । प्रिन्सिपल कुँवरले ५५ हजार बक्यौता छ भनेका तर बुबाले ३५ हजार तिर्न बाँकी रहेको र लकडाउन खुलेपछि १० हजार दिने भनेपनि नमानेर कुटपिट गरेको उनले बताए ।
२८ साउनमा रानीनगर बजार गएका बेला पिछा गरेर प्रिन्सिपलले समातेर धकेल्दै विद्यालयका लेखापाल बाबुराम सुवेदीको घरमा लगेर हात बटारिदिएर गर्धनमा हान्दा लडेर खुट्टा भाँच्चिएको भरत बताउँछन् । तिर्नुपर्ने सबै पैसा अहिले नै दिन्छस् कि दिँदैनस् भन्दै प्रिन्सिपलले कुटपिट गरेको भरतले बताए ।
पीडित परिवारले भदौ ९ गते जिल्ला प्रहरी कार्यालय नवलपुरमा जाहेरी दर्ता गरेका थिए । तर, प्रहरीले कुँवरलाई अझैसम्म पनि पक्राउ गर्न सकेको छैन । राजनीतिक शक्तिको आडमा प्रहरी प्रशासन पनि प्रभावित भएर प्रिन्सिपललाई पक्राउ नगरिएको पीडित परिवारको आरोप छ ।
