- अर्थ सरोकार सम्बाददाता
सप्तरी । सप्तरीमा एकैदिन थप ५० जनामा कोरोना संक्रमण पुष्टी भएको छ । जिल्ला स्वास्थ्य कार्यालयका अनुसार सरकारी कार्यालयका कर्मचारीसहित ५० जनामा कोरोना संक्रमण पुष्टी भएको हो । जिल्ला अदालतका स्रेस्तेदारसहित पाँच कर्मचारी, सिडिओ कार्यालय सप्तरीका दुई जना कार्यालय सहायक, एक जना प्रहरी र एक जना भान्सेमा कोरोना देखिएको छ।
राजविराजस्थित गजेन्द्रनारायण सिंह अस्पतालको प्रयोगशालामा गरिएको परीक्षणमा राष्ट्रिय अनुसन्धान कार्यालयका कर्मचारी र प्रहरीलाई पनि कोरोना देखिएको छ । त्यस्तै, दुई जना स्वास्थ्यकर्मी, एक जना मिर्गौलापीडित र तीन जना अन्य बिरामीलाई पनि संक्रमण पुष्टी भएको छ । थपिएका संक्रमितमा राजविराज नगरपालिका–१ का ३२ जना रहेका छन् । योसँगै सप्तरीमा संक्रमित हुनेको संख्या एक हजार ९० पुगेको जिल्ला स्वास्थ्य कार्यालयले जनाएको छ । हालसम्म कोरोनाबाट नौ जनाको मृत्यु भएको छ।
