- अर्थ सरोकार सम्बाददाता
ओखलढुंगा । सनराइज बैंक लिमिटेडमा शंकास्पद नोट भेटिएका छन् । बैंकको ओखलढुंगा शाखामा नेपाल राष्ट्र बैंकका गभर्नरको हस्ताक्षर नै नभएका नोट फेला परेका हुन् । गभर्नरको हस्ताक्षर बिनाका नोट उक्त बैंकमा भेटिएपछि नियामक राष्ट्र बैंकले थप अनुसन्धान गर्ने भएको छ ।
यता ओखलढुंगा शाखाका प्रबन्धक खेमराज राना मगरले भने अन्य बैंकबाट ल्याएको गड्डीमा यस्तो नोट भेटिएको बताएका छन् । ‘ग्लोबल आइएमई बैंक, सिभिल बैंक र एनआईसी एशिया बैंकबाट सिल भएर आएको बन्डलमा भेटिएको ती नोट भेटिएका हुन्’ उनले भने ।
यता सनराइजका ग्राहकहरु हस्ताक्षर नै नभएको नोट भेटिएको भन्दै ग्राहकहरु अलमलमा परेका छन् । सनराइज बैंकले गभर्नरको हस्ताक्षर नभएका ५ सय रुपैयाँका नोट क्रमश आइतबार दुई थान, सोमबार तीन थान र मंगलबार आठ थान फेला पारेको थियो । यस्तै मेगा बैंकको शाखामा पनि दुई थान गभर्नरकै हस्ताक्षर नभएका नोट भेटिएका छन् ।
