• अर्थ सरोकार सम्बाददाता 

काठमाडौं । वैदेशिक रोजगारीका लागि दक्षिण कोरिया जान चाहेका झन्डै ९ हजार नेपाली नेपालमै रोकिन बाध्य भएका छन् । नेपालबाट प्रक्रिया पूरा गरी कोरिया जान अनुमति पाएका उनीहरु कोरोना बिमा नगरेका कारण नेपालमै रोकिन बाध्य भएका हुन् । कोरिया सरकारले उनीहरु सबैको १० लाखको कोरोना बिमा मागेपछि कोरिया पठाउन नसकिएको वैदेशिक रोजगार विभागका महानिर्देशक कुमार दाहालले बताए ।

नेपालमा विदेश जाने श्रमिकको हकमा कोरोना बिमा गर्ने व्यवस्था अहिलेसम्म छैन । कोरिया सरकारले भने उक्त व्यवस्था नभएर छुट्टै कोरोना बिमा गर्नुपर्ने शर्त राखेको छ । यता नेपाल सरकारले भने नेपालमा रोकिन बाध्य भएका उनीहरुलाई जतिसक्दो छिटो प्रक्रिया मिलाएर पठाउन लागि परेको उनको भनाई छ । कोरोना महामारीका कारण गत फागुनदेखि सरकारले वैदेशिक रोजगारीका लागि कोरिया जान रोकेको छ । 

नेपालबाट प्रक्रिया पूरा गरेका उनीहरुले सरकारी लापरवाहीले गर्दा रोजगारी नपाउने निश्चित भएको भन्दै पटक-पटक माइतीघरमा प्रदर्शन गरेका छन् । साथै ठूलो लगानी र मिहिनेत गरेर भाषा परीक्षा पास गरेको भएरपनि  सरकारले गरेको लापर्वाहिले भविष्य अनिश्चित भएको उनीहरुको गुनासो छ ।