• अर्थ सरोकार सम्बाददाता 

काठमाडौँ । सरकारले ९ जना सचिवहरुको हेरफेर गरेको छ । प्रधानमन्त्रीको सरकारी निवास बालुवाटारमा बिहीबार साँझ नवनियुक्त मन्त्रीसहित बसेको मन्त्रिपरिषद्को बैठकले सचिवहरूको हेरफेर गरेको हो ।

नवनियुक्त मन्त्रीसहित बसेको मन्त्रिपरिषद्को बैठकले भौतिक पूर्वाधार तथा यातायात मन्त्रालयका सचिव देवेन्द्र कार्कीलाई जल तथा ऊर्जा आयोगमा पठाएको छ भने सिँचाइ सचिव रवीन्द्रमान श्रेष्ठलाई भौतिक पूर्वाधार तथा यातायात मन्त्रालय जिम्मेवारीमा पठाएको छ । 

यस्तै प्रधानमन्त्री कार्यालयका सचिव यादव कोइरालालाई संघीय मामिला तथा सामान्य प्रशासन मन्त्रालयको जिम्मेवारी दिइएको छ  भने उक्त मन्त्रालयका सचिव सूर्य गौतमलाई भने युवा तथा खेलकूद मन्त्रालयमा सरुवा गरिएको छ । जल तथा ऊर्जा आयोगका सचिव रमेशप्रसाद सिंहलाई सहरी विकास मन्त्रालयमा सरुवा गरिएको छ । 

संस्कृति, पर्यटन तथा नागरिक उड्डयान मन्त्रालयको जिम्मेवारी सचिव एकनारायण अर्याललाई दिइएको छ । प्रधानमन्त्रीका कार्यालयका अर्का सचिव केदार न्यौपानेलाई उपराष्ट्रपति कार्यालय सरुवा गरिएको छ भने कार्यालयका सचिव खगराज बराललाई भने प्रधानमन्त्री कार्यालयको जिम्मेवारीमा पठाइएको छ ।