• अर्थ सरोकार सम्बाददाता 

सिन्धुली । सिन्धुली जिल्लामा एकै दिन २७ जनामा कोरोना संक्रमण पुष्टी भएको छ । सदरमुकामस्थित बैंकका कर्मचारी, स्वास्थ्यकर्मी, सरकारी कर्मचारी, नेपाली सेना, शिक्षक लगायतका स्वाब परीक्षण गर्दा २६ जनाकाे रिपोर्ट पोजिटिभ आएको हो । यो सँगै जिल्लामा सक्रिय संक्रमितको संख्या ६५ पुगेको छ भने जम्मा संक्रमितको संख्या १ सय ३३ जना पुगेको छ ।

यसैबीच सिन्धुलीमा मंगलबार भेटिएका संक्रमितलाई राख्ने आइसोलेसनको अभाव भएको छ । कोभिड १९ उपचार केन्द्र एपोलो अस्पताल र सिन्धुली अस्पतालमा रहेको ३९ वेडको आइसोलेसन भरिएपछि संक्रमितहरुलाई होम आइसोलेसनमा राख्ने तयारी भइरहेको जिल्ला प्रशासन कार्यालय सिन्धुलीले जनाएको छ ।

कर्मचारीमा कोरोना संक्रमण पुष्टी भएसंगै सिद्धार्थ बैंक, मेगा बैंक, एनआइसि एसिया बैंक र सहकारीको काम काज अर्को सूचना नभएसम्मका लागि बन्द गरिएको छ । साथै, मालपोत कार्यालय सिन्धुलीका सूचना अधिकारी एवम् नायव सुब्बा पुरुषोत्तम दाहाललाई कोरोना संक्रमण देखिएपछि मालपोत कार्यालय अर्को सूचना जारी नभएसम्मका लागि बन्द गरिएको हो । मालपोत कार्यालयले सार्वजनिक सूचना जारी गरी अन्य कर्मचारी समेत विरामी भएकाले कार्यालय अर्को सूचना जारी नभएसम्मका लागि नखुल्ने जानकारी गराएको छ । दाहालले सामाजिक सञ्जाल फेसबुक मार्फत आफ्नो सम्पर्कमा रहेका सबैलाई सचेत रहन आग्रह समेत गरेका थिए ।