• अर्थ सरोकार सम्बाददाता 

काठमाडौं । आइतबार साँझसम्म सञ्चालनमा रहेको व्यापारिक घराना विशाल ग्रुपको वेबसाइट सोमबार बिहानैदेखि बन्द भएको छ । बेभसाइटमा अन्डरमेन्टिनेन्स भनेर उल्लेख गरेपनि बिशाल ग्रुप निकट स्रोतकाअनुसार आफ्ना सूचना र आयान डिस्ट्रिब्युटर्ससँगको सम्बन्ध थाहा पाउने भएकाले वेभसाइट बन्द गरिएको जानकारी दिए । जिल्ला प्रशासन कार्यालय, वाणिज्य विभाग र महानगरीय अपराध महाशाखाको टोलीले असोज १५ मा विशाल ग्रुपको अमेजन र आयान डिस्ट्रिब्युटर्सको गोदाममा छापा मार्दा ओरियो बिस्कुट, स्निकर्स र मार्स चक्लेट, ट्याङ जुस, बर्नभिटा लगायतका म्याद सकिएका सामग्रीमा नयाँ लेबल लगाएर बजारमा पठाइएको भेटिएको थियो ।

वाणिज्य विभागले पनि विशाल ग्रुप अन्तर्गतको आयान डिस्ट्रिब्युटर्स र अमेजन डिस्ट्रिब्युटर्सको गोदाममा छापा मारी आयान डिस्ट्रिब्युटर्सका म्यानेजर रोनक बोथ्रालाई पक्राउ गरेयताको दैनिक अनुगमन विवरण अद्यावधिक गर्न छोडेको छ भने कारबाही विवरणको पनि अभिलेख राखिएको छैन । आइतबार विशाल ग्रुपले विज्ञप्ति जारी गर्दै आयान डिस्ट्रिब्युटर्स र युनाइटेड डिस्ट्रिब्युटर्स नेपालसँग आफ्नो कुनै सम्बन्ध नरहेको जनाएको थियो ।