- अर्थ सरोकार सम्बाददाता
काठमाडौं । बैंक अफ काठमाण्डूले चालु आर्थिक वर्षको पहिलो त्रैमासमा नाफा घटेको वित्तीय विवरण सार्वजनिक गरेको छ । बैंकले खुद नाफा ३७.०८% ले घटेर २४ करोड १४ लाख ६ हजार रुपैयाँ मात्रै कमाएको वित्तीय विवरण सार्वजनिक गरेको हो । अघिल्लो वर्षको यसैअवधिमा बैंकले ३८ करोड ३७ लाख २५ हजार रुपैयाँ नाफा कमाएको थियो ।
यस्तै बैंकको खुद ब्याज आम्दानी २१.२१% ले घटेर ७६ करोड ९९ लाख ४५ हजार रुपैयाँमा खुम्चिएको छ भने सञ्चालन नाफा पनि ३७.०८% ले घटेर ३४ करोड ४८ लाख ६६ हजार रुपैयाँमा सीमित भएको छ । बैंकको खुद ब्याज आम्दानी र सञ्चालन नाफा घटेकाले खुद नाफामा नकारात्मक प्रभाव परेको हो । साथै, खराब कर्जा बढेकाले पनि त्यसको असर नाफामा परेको हो ।
अहिलेसम्म आउँदा बैंकको वितरणयोग्य नाफा भने १२ करोड ६० लाख ५६ हजार रुपैयाँ ऋणात्मक छ । खराब कर्जा ०.४५% ले बढेर २.१८% मा पुगेको छ । प्रतिसेयर आम्दानी वार्षिक ११ रुपैयाँ ३० पैसा र प्रतिसेयर नेटवर्थ १७२ रुपैयाँ ९२ पैसा रहेको सार्वजनिक वित्तीय विवरणमा उल्लेख छ ।
