• अर्थ सरोकार सम्बाददाता

काठमाडौँ । हालसम्म वाणिज्य बैंकमा कार्यरत ६ हजार बढी कर्मचारीमा कोरोना संक्रमण पुष्टी भएको छ । बैकिङ क्षेत्रमा कुल ५० हजार कर्मचारी कार्यरत रहेकोमा हालसम्म ६ हजार भन्दा बढी कर्मचारीमा संक्रमण पुष्टी भएको हो ।पछिल्लो समय देशभर कोरोना संक्रमितको संख्या ह्वात्तै बढेको छ । देशभर संक्रमित हुने कुल मानिसको संख्या २ लाख नजिक रहेको छ । 

स्वास्थ्य तथा जनसंख्या मन्त्रालयका अनुसार सोमबारसम्म संक्रमितको कुल संख्या १ लाख ९७ हजार २४ पुगेको छ । यस्तै देशभर ३६१७४ जना सक्रिय संक्रमित आइसोलेसनमा रहेका छन् । बैंक तथा वित्तीय संस्थामा पनि कोरोना भाइरसको संक्रमण अत्याधिक बढ्दो छ । विशेष गरी काठमाडौँ उपत्यकामा को रोनाको जोखिम अत्याधिक छ । बैंकका कर्मचारीमा संक्रमण हुने क्रम बढेपछि बैंकहरुले डिजिटल बैकिङलाई जोड दिँदै आएका छन् ।

सम्पूर्ण ग्राहकहरुलाई डिजिटल बैकिङमार्फत कारोबार गर्न पनि आग्रह गरेका छन् । कोरोना भाइरसको संक्रमणलाई ध्यानमा राख्दै बैंकर्स संघले आउंदै गरेको तिहारमा ३ दिन बैंक पुर्ण रुपमा बन्द रहने जनाएको छ । बैंक बन्द भएता पनि डिजिटल  बैकिङ र एटिएम सेवा सुचारु रहने संघले जनाएको छ।