- अर्थ सरोकार सम्बाददाता
भक्तपुर । भक्तपुरमा यस वर्ष नयाँ ईट्टा उत्पादन नहुने भएको छ । कोरोना संक्रमणको त्रासले गर्दा यो वर्ष कामदार ल्याउन समस्या भएको हुनाले यस वर्ष ईटा भक्तपुरका ईटा व्यवसायीहरुले ईट्टा उत्पादन नगर्ने भएका हुन् ।
‘स्थानीय सरकार र व्यवसायीहरुको भावनालाई मध्यनजर गर्दै यो वर्ष उद्योग सञ्चालन नगर्ने छलफल भयो । तर, बजारमा गतसालको ईट्टा पर्याप्त भएकाले ईट्टाको अभाव हुँदैन र मूल्य पनि बढ्ने छैन।’ भक्तपुर ईट्टा व्यवसायी संघका अध्यक्ष नातीभाई हेम्बाले जानकारी दिए ।
यस वर्ष कोरोनाले गर्दा व्यवसायीले नगरपालिकालाई तिर्दैं आएको स्थानीय कर बापत बुझाउनु पर्ने प्रति भट्टा ७ लाख रुपैयाँ समेत बुझाउन नसक्ने बताएका छन् । ईट्टा उत्पादन नहुने भएपछि एक व्यवसायीलाई करिब ४० लाख रुपैयाँ भन्दा धेरै नोक्सान हुने व्यवसायीहरुको भनाई छ ।
भक्तपुरका ईटा भट्टाहरुमा विशेष गरी सल्यान, रोल्पा, रुकुम, काभ्रे, सिन्धुपाल्चोक, रामेछाप, दोलखा, सिन्धुली, सिराहा, सर्लाहीलगायतका जिल्ला र भारतबाट समेत मजदुरहरु आउने गर्दछन् । व्यवसायीहरुले ईट्टा उत्पादन नगर्ने भएपछि काचोँ ईटा बनाउने, गाडीमा लोड गर्ने, पोल्ने, गाडी चलाउने लगायतका कार्य गर्ने करिब ५० हजार मानिसको रोजगारी गुम्ने भएको छ ।
प्रतिक्रिया दिनुहोस्