• अर्थ सरोकार सम्बाददाता 

विराटनगर। विराटनगर भन्सारबाट चालु आर्थिक वर्षको तीन महिनामा  मात्रै १८ हजार टन चामल आयात भएको छ। यो अघिल्लो वर्षको तुलनामा साढे १० हजार टन बढी आयात हो । भन्सार कार्यालय विराटनगरका अनुसार गत वर्षको सोही अवधिमा गत आवको असोज मसान्त सम्ममा यही नाकाबाट ३१ करोड १२ लाख मूल्यको ७ हजार ४ सय ३४ टन चामल आयात भएको थियो । भारतमा रासनमा वितरण गरिएको चामलका कारणले विराटनगर नाकाबाट ५२ हजार टनभन्दा बढी चामल आयात हुनसक्ने प्रक्षेपण व्यवसायीले गरेका छन् ।

भारतमा वितरण गरेको रासनको चामल विराटनगर, वीरगञ्ज र भैरहवाजस्ता मुख्य भन्सारबाट नियमित रूपमा भित्रिरहेको व्यवसायीहरुले दाबी गरेका छन् ‘रासनको चामल प्रशस्त भित्रिएका कारण जिरा मसिनो चामलको मूल्य र विक्रीमा असर परेको छ  ।

सोना चामल नेपालमा प्रशस्त भित्रिएपछि जिरा मसिनो खरिद गर्ने पनि सोनामा पल्किएका छन् । गत वर्ष यति बेला प्रति किलो ५६ रुपैयाँमा जिरा मसिनो चामल विक्री गरेको र यस वर्ष पनि यही भाउमा विक्री भइरहेको एक व्यवसायीले  जानकारी दिए। ‘हामीले धान खरिद गरेर ९ महिनासम्म गोदाममा राख्यौँ’, तोदीले भने, ‘त्यसको सुक्तीमा घाटा भयो। गोदाम भाडा, श्रमिकको खर्च र ब्याज सबै लाग्यो । अहिले विक्री हुने बेलामा घटेर बेच्नु पर्‍यो।