काठमाडौँ । बैंक अफ काठमाण्डू र हिमालयन बैंकले चीनको अदालतमा विगत आठ वर्षदेखि विचाराधीन रहेको मुद्दा जितेका छन् । चीनको तल्लो अदालतले बैंक अफ काठमाण्डू र हिमालयन बैंकको पक्षमा मुद्दा फैसला गरेसँगै चाइना रेलवे ग्रुप अफ कम्पनीले बैंक ग्यारेन्टी बसेवापत लगेको रकम फिर्ता गर्नुपर्ने भएको हो ।

मेलम्ची खानेपानी आयोजनामा काम गर्न आएको चिनियाँ ठेकेदार कम्पनी चाइना रेल्वे कम्पनीको लागि चाइना कन्स्ट्रक्सन बैंकमार्फत दुवै नेपाली बैंकले काउन्टर ग्यारेन्टी प्राप्त गरेका थिए । तर, उक्त ठेकेदार कम्पनीले बीचैमा काम छाडेर हिडेपछि दुवै बैंकको काउन्टर ग्यारेन्टी फसेको थियो । सुरूमा चाइना कन्स्ट्रक्सन बैंकले उक्त ग्यारेन्टी वापतको रकम दिन अस्वीकार गरेको थियो । त्यसपछि, मुद्धा चीनको अदालतमा पुगेको थियो।