हुम्ला । हुम्लाको नाम्खा गाउँपालिकाको वडा नं ६ स्थित लिमी लाप्चाबाट कैलाश मानसरोवर दर्शन गर्न भारतीय पर्यटक यहाँ आइपुगेका छन् । आन्तरिक पर्यटक समेत मानसरोवर नपुगेको समयमा पहिलो पटक भारतीय धार्मिक पर्यटक एक टोली सिमकोट आइपुगि लाप्चा तर्फ लागेको हुन् । कोरोना कहरका कारण मानसरोवर जान सिमानाका बन्द गरिएको थियो । कैलाश ट्रेकका पर्यटन व्यवसायी विष्णु रावतले मानसरोवर दर्शन गर्न जाने समय (सिजन)को अन्त्यतिर आएसँगै ती पयर्टक हुम्लाको लिमी लाप्चाबाटै दर्शनका लागी त्यस तर्फ लागेको जानकारी दिनुभयो ।
ती पर्यटक नेपालगञ्ज हुँदै सिमकोट पुगी सवारी साधन मार्फत लाप्चा तर्फ लागेका हुन् । ती पर्यटक लिमीको लाप्चामा तीनदेखि चारदिनसम्म बसेर सिमकोट फिर्ता हुने उहाँले बताउनुभयो । उक्त टोलीले एक रात चार हजार दुई सय मिटर अग्लो उचाईमा रहेको तुम्लिङमा बास बस्ने र भोली पल्ट बिहान पाँच हजार मिटर अग्लो लाप्चाबाट कैलाश मानसरोवरको दर्शन गर्ने योजना बनाएका छन् ।
सो टोलीले सफल यात्रा गरेमा कात्तिक अन्तीमसम्म अन्य बीसदेखि पच्चीस जनाले कैलाश मानसरोवर दर्शनका लागी आउने तयारी गरेको व्यवसायी रावतले बताउनुभयो । नजिकबाट दर्शन गर्न नपाएपनि लिमीको लाप्चाबाट दर्शन गर्दा हेलिकप्टर भन्दा यात्राको लागि खर्च निकै कम लाग्ने गरेको छ । छिमेकी देशका पर्यटक आउँदा यहाँका होटेल व्यवसायी औधी रमाउँदै पर्यटन प्रवद्र्धन हुनेमा खुशी छन् । -रासस
