- अर्थ सरोकार सम्बाददाता
म्याग्दी । म्याग्दीको धवलागिरि गाउँपालिका –५ मा अवस्थित दुर्गमबस्ती मल्कवाङमा निर्माणधीन स्वास्थ्यचौकी भवन अलपत्र परेको छ । दुई वर्षभित्रमा निर्माण सम्पन्न गर्ने गरी ठेक्का लिएको निर्माण कम्पनीको लापरवाहीका कारण भवन अलपत्र परेको जनाइएको छ । भवन अलपत्र पर्दा मल्लकवाङवासीले पुरानो जीर्ण भवनबाट स्वास्थ्यसेवा लिनुपर्ने बाध्यता रहेको स्थानीय युवा अमर छन्त्यालले बताए । अठार महिनामा सम्पन्न गर्ने लक्ष्यसहित दुई तले १४ कोठे भवनमा बिरामीको उपचारका लागि श्यया, औषधि भण्डारण, कर्मचारी आवास, प्रशासन, तालीम हलका लागि छुट्टाछुट्टै कक्ष रहने गरी ठेक्का सम्झौता भएको थियो ।
शहरी विकास तथा भवन निर्माण डिभिजन कार्यालयबाट भवन निर्माण गर्न प्रतिस्पर्धामार्फत वोल्ड वाइड मालीका भगवती जेभिले तीन वर्ष अघि रु एक करोड ७४ लाखमा ठेक्का सम्झौता गरेको थियो । पहिलो तला ढलान गरेपछि निर्माण कम्पनी कार्यक्षेत्रमा फर्किएर आएको छैन ।
मौखिक रुपमा पटक–पटक ताकेता गरिएको भए पनि निर्माण कम्पनीले बेवास्ता गर्दा भवनको संरचना समेत जीर्ण र पुरानो हुँदै गएको वडाध्यक्ष खर्ककुमारी छन्त्यालले बताइन् । यता निर्माण कम्पनीका प्रतिनिधि गोपाल भट्टचनले कोरोना महामारीका कारण मजदूर बाहिरबाट लैजान समस्या भएकाले निर्माणलाई अघि बढाउन समस्या भएको बताएका छन् ।
