• अर्थ सरोकार सम्बाददाता

काठमाडौं । राष्ट्रपति विद्यादेवी भण्डारीले भारतीय सेनाध्यक्ष मनोज मुकुन्द नरवणेलाई नेपाली सेनाको मानार्थ महारथीको उपाधि प्रदान गरेकी छन् । राष्ट्रपति भवन शितल निवासमा आयोजित कार्यक्रममा राष्ट्रपति भण्डारीले नरवणेलाई मानार्थ महारथीको उपाधि प्रदान गरेकी हुन् । 

नेपाली सेना र भारतीय सेनाबीच एक–अर्का देशका सैनिक प्रमुखलाई मानार्थ महारथी दर्जा प्रदान गर्ने परम्पराअनुरुप नरवणे नेपाली सेनाको मानार्थ महारथी ग्रहण गर्न बुधबार नेपाल आएका हुन् । नेपालका तर्फबाट मानार्थ महारथी प्राप्त गर्ने भारतीय स्थलसेनाध्यक्ष जनरल नरवणे १८औँ सेनापति भएका छन्।

उक्त समारोहपछि भारतीय सेनाध्यक्ष नरवणेले राष्ट्रपति भण्डारीसँग भेटवार्तासमेत गरेका थिए। भेटवार्तामा राजदूत क्वात्राको पनि उपस्थिति थियो ।