• अर्थ सरोकार सम्बाददाता 

सप्तरी । सप्तरी र हेटौंडामा कोरोना संक्रमणका कारण थप दुई जनाको मृत्यु भएको छ । सप्तरीको विष्णपुर गाउँपालिकाको सिम्राहा गाउँकी २३ वर्षीया महिला र चितवनको भरतपुर अस्पतालमा हेटौंडा उपमहानगरपालिका ६ का एक ८२ वर्षीय वृद्धको मृत्यु भएको हो । 

सप्तरीकी महिलालाई बिरामी भएपछि शनिबार धरानस्थित बीपी कोइराला स्वास्थ्य विज्ञान प्रतिष्ठानमा भर्ना गरिएको थियो । उनको पीसीआर रिपोर्ट बुधबार पोजिटिभ आएको थियो । हेटौंडाका ८२ वर्षीय वृद्धमा कात्तिक १५ गते कोरोना संक्रमण पुष्टि भएको थियो । ज्वरो, खोकी र श्वासप्रश्वासमा समस्या भएपछि बुधबार अस्पताल भर्ना भएका थिए । पछिल्लो २४ घण्टामा ३० जनाको मृत्यु भएको नेपालमा एक हजार ३४ जनाले ज्यान गुमाइसकेका छन् ।