• अर्थ सरोकार सम्बाददाता 

काठमाडौँ । पार्टी फुटको संघारमा पुगेकै बेला सत्तारुढ दल नेपाल कम्युनिस्ट पार्टी (नेकपा) का अध्यक्ष एवं प्रधानमन्त्री केपी शर्मा ओलीले कांग्रेसका सभापति देउवासँग गोप्य भेटघाट गरेका छन् । प्रधानमन्त्री ओलीले देउवासँग भेट गरी सत्ता साझेदारीको प्रस्ताव गरेका छन् । 

प्रधानमन्त्री ओलीले संवैधानिक नियुक्तिका विषयमा छलफल गर्न भन्दै देउवालाई शनिबार दिउँसो प्रधानमन्त्रीनिवास बालुवाटारमा बोलाएपछि आफूनिकट केन्द्रीय सदस्यहरूलाई लिएर देउवा बालुवाटार पुगेका थिए । झन्डै करिब डेढ घन्टासम्म संवैधानिक निकायमा नियुक्ति र समसामयिक राजनीतिक घटनाक्रमका विषयमा छलफल भए पनि नेताहरूले भेटलाई गोप्य राखेका छन् । 

भेटका क्रममा प्रधानमन्त्री ओलीले देउवासँग सत्ता साझेदारीको प्रस्ताव गरेको बताइएको छ । सो भेटमा ओलीका तर्फबाट उपप्रधानमन्त्री ईश्वर पोखरेल, नेकपा संसदीय दलका उपनेता सुवास नेम्वाङ, परराष्ट्रमन्त्री प्रदीप ज्ञवाली, स्वास्थ्यमन्त्री भानुभक्त ढकाललगायत सहभागी थिए ।