- अर्थ सरोकार सम्बाददाता
काठमाडौं । चालु आर्थिक वर्षको पहिलो त्रैमासमा सनराइज बैंकका अधिकांश सूचकहरु घटेका छन् । अधिकांश बैंकहरुले नाफामा चमत्कार गर्दा सनराइज बैंकले भने अधिकांश सूचकहरु घटेको वित्तीय विवरण सार्वजनिक गरेको हो ।
सार्वजनिक वित्तीय विवरण अनुसार बैंकको खुद नाफा १५.७१% ले घटेर ३८ करोड २९ लाख ७७ हजार रुपैयाँमा सीमित भएको छ । अघिल्लो वर्षको सोही अवधिमा बैंकले ४५ करोड ४३ लाख ६७ हजार रुपैयाँ नाफा कमाएको थियो ।
यता बैंकको खराब कर्जा पनि ०.३१% ले बढेर १.५८% मा पुगेको छ । यस्तै बैंकको वितरण योग्य नाफा २४ करोड ९६ लाख ५० हजार रुपैयाँ ऋणात्मक रहेको छ । खुद ब्याज आम्दानी र सञ्चालन नाफा क्रमशः १५.६७% र १५.७१% ले घटेको सार्वजनिक वित्तीय विवरणमा उल्लेख छ । यसअवधिमा बैंकको प्रतिसेयर आम्दानी १७ रुपैयाँ ०८ पैसा छ भने प्रतिसेयर नेटवर्थ १५३ रुपैयाँ ९२ पैसा रहेको बैंकले जनाएको छ ।
