- सुदर्शन श्रेष्ठ/अर्थ सरोकार सुदूरपश्चिम ब्युरो
धनगढी । धनगढी उपमहानगरपालिकाले डोजर लगाएर टहरो भत्काउएपछि तीन दिनदेखि एक परिवार खुला आकाशमुनि बस्न बाध्य भएको छ । उपमहानगरपालिकाको वडा नम्बर १ कैलालि पुल नजिक बस्दै आएकी नरु देवी बोहोराको परिवार खुला आकाशमुनि बस्न बाध्य भएको हो ।
करिब १२ बर्षदेखि ऐलानी जग्गामा बस्दै आएको उक्त परिवारको टहरो उपमहानगरपालिकाकाले आईतबार डोजर लगाएर भत्काएको थियो । आफुले उक्त जग्गामा ८ वर्षसम्म भाडा तिरेको तर त्यसबखतमा कसैको ध्यान नगएको टहरोमा नगरपालिकाले ज्यादति गर्दै उठिबास लगाएको उनले बताईन ।
द्धन्दकाल देखि नै विस्थापित भएको आफ्नो परिवारलाई सरकारले पनि नहेरेको उनको गुनासो थियो । उनले भनिन्, ‘२०६० सालमा गोली लाग्यो तर त्यो भन्दा बढी पिडा अहिले आफ्ना लागि सरकार मौन हुँदा भएको छ ।’ खोला किनारमा बस्ने रहर आफुलाई पनि नभएको बताउँदै उनले आफुहरुको व्यवस्थापन गरिदिनुपर्ने माग गरिन् ।
चिसोको समयमा अहिले उनको परिवार खुला आकासमुनि रात काट्न बाध्य भएको छ । उपमहानगरपालिकाले नाप नक्साभित्र परको जग्गा भनी डोजर लगाएर उनको टिनको टहरो आईतबार भत्काएको थियो ।
