- अर्थ सरोकार सम्बाददाता
काठमाडौं । नबिल बैंक लिमिटेडका सेयरधनीहरुले लाभांश पाउने भएका छन् । बैंकको ६ गते बसेको ५५२औं संचालक समितिको बैंठकले आर्थिक वर्ष २०७६/७७ को नाफाबाट लाभांश दिने घोषणा गरेको हो । सेयरधनीहरुले ३३.५ प्रतिशत बोनस सेयर र कर प्रयोजनको लागि १.७६ प्रतिशत नगद लाभांश गरी कुल ३५.२६ प्रतिशत लाभांश पाउने भएका छन् ।
उक्त प्रस्तावित लाभांश नेपाल राष्ट्र बैंकले स्वीकृत गरेपछि र बैंकको आगामी ३६औं वार्षिक साधारणसभाको पारित गरेपछि मात्र बैंकका सेयरधनीहरुले पाउने भएका छन् । बैंकल आर्थिक वर्ष २०७६/७७ मा निजी क्षेत्रका बैंकहरुमध्ये उच्चतम ३ अर्व ४६ करोड रुपैया नाफा आर्जन गर्न सफल भएको छ । बैंकले जेथामा प्रतिफल १३.६१ प्रतिशत र प्रति सेयरआम्दानी ३६.१६ प्रतिशत रहेको छ । यसैगरी आफ्नो वासलात विस्तार गर्दै २ खर्ब ३८ अर्ब पुर्याएको छ । बैंकको संचालन नाफा ५ अर्ब ९ करोड रुपैया रहेको छ ।
आर्थिक वर्ष २०७५/७६ मा वित्तीय क्षेत्रबाट ठूला करदाताहरुमध्ये सबै भन्दा बढी आयकर बुझाउन सफल बैंकको रुपमा नबिल बैंक स्थापित भएको छ । यस बैंकले आधुनिकिकरणलाई आत्मसाथ गर्दै डिजी बैंकको अवधारणालाई समेत अवलम्बन गरेको छ । नबिल बैंकले १ सय १९ वटा शाखाहरु, १ सय ८५ वटा एटिएम र १५०० भन्दा बढी नबिल रेमिट एजेन्टहरुका साथमा देशव्यापी रुपमा र विश्वभर धेरै एजेन्टहरुमार्फत सेवा प्रदान गरेर आफ्ना सबै सरोकारवालाहरुसंग संगै अघि बढ्ने विश्वास राखेको छ ।
