• अर्थ सरोकार सम्बाददाता 

धनुषा । प्रहरीले धनुषाबाट साढे २५ लाख रुपैयाँसहित दुई जना हुण्डी कारोबारीलाई पक्राउ गरेको छ । धनुषा प्रहरीले महोत्तरी बस्ने एक जना टेन्ट व्यवसायी सञ्जय साह र भारत पिपरौनका सुमित यादव पक्राउ गरेको हो । 

धनुषाको जटही नाकाबाट साढे २५ लाख रुपैयाँसहित उनीहरूलाई पक्राउ गरिएको जिल्ला प्रहरी कार्यालय धनुषाका प्रहरी उपरीक्षक प्रकाश रानाभाटले बताए । जिल्ला प्रहरी कार्यालय धनुषाबाट खटेको टोलीले गोप्य सूचनाको आधारमा साढे २५ लाख हुण्डी रकमसहित भारततर्फ गइरहेको अवस्थामा उनीहरूलाई जटही नाकाबाट पक्राउ गरेको हो  ।  

यस्तै भारतीय नम्बर प्लेटको मोटरसाइकलबाट उनीहरूलाई पक्राउ गरिएको र थप अनुसन्धानका लागि राजश्व अनुसन्धान कार्यालय पथलैया पठाइएको छ ।