• अर्थ सरोकार सम्बाददाता

काठमाडौं । ग्रामीण विकास लघुवित्तको वित्तीय विवरण सार्वजनिक गरेको छ । कम्पनीले चालु आर्थिक वर्षको दोस्रो त्रैमासको वित्तीय विवरण सार्वजनिक गरेको हो । कम्पनीले दोस्रो त्रैमाससम्म आईपुग्दा १७ करोड ८४ लाख रुपैयाँ नाफा कमाएको छ । जुन नाफा गत वर्षको भन्दा ५९.४४ प्रतिशतले बढी हो । गत वर्ष कम्पनीले ११ करोड १८ लाख रुपैयाँ नाफा कमाएको थियो । कम्पनीले खुद ब्याज आम्दानी ३.७४ प्रतिशतले बढाएको छ भने सञ्चालन नाफा ५८.२१ प्रतिशतले बढेको छ ।

गत वर्ष ५३ करोड ८१ लाख रुपैयाँ खुद ब्याज आम्दानी गरेको यसले यो त्रैमाससम्म बढाएर ५५ करोड ८३ लाख रुपैयाँ पुर्याएको छ । यस्तै कम्पनीले सञ्चालन नाफा पनि १२ करोड ६८ लाख रुपैयाँबाट बढाएर २० करोड ६ लाख रुपैयाँ पुर्याएको छ । पुस मसान्तसम्म ३ अर्ब ७५ करोड रुपैयाँ निक्षेप संकलन गरेको ग्रामीणले ११ अर्ब १८ करोड रुपैयाँ कर्जा लगानी गरेको छ ।

हाल यसको चुक्ता पुँजी ९८ करोड २५ लाख रुपैयाँ रहेको छ भने रिजर्भ कोषमा ७७ करोड रुपैयाँ रहेको छ । यसैगरी गत वर्ष ४.४५ प्रतिशत रहेको यसको खराब कर्जा यो त्रैमाससम्म आउँँदा घटेर ४.२० प्रतिशत भएको छ । प्रति सेयर आम्दानी ३६ रुपैयाँ ३२ पैसा रहेको ग्रामीणको प्रतिसेयर नेटवर्थ १७८ रुपैयाँ ४६ पैसा रहेको छ ।