- अर्थ सरोकार सम्बाददाता
काठमाडौं । २०७५ माघ २७ गतेबाट बीमा कारोवार प्रारम्भ गरेको महालक्ष्मी लाईफ इन्स्योरेन्स लिमिटेडले कारोवार संचालनको दुई बर्ष पुरा गरेको छ । नेपालको जीवन बीमा बजारमा सबैभन्दा कान्छो र १९औं कम्पनीको रूपमा काम सुरू गर्दा ९ वटा पुराना स्थापित कम्पनी र ९ वटा नयाँ कम्पनीहरूसँग प्रतिस्पर्धा गर्नु परेको थियो । कसैगरी व्यापार वृद्धि गरी आफूलाई अब्बल देखाउने होड र अस्वस्थ प्रतिस्पर्धाबीच स्वस्थ व्यापार गर्नु आफैमा ठूलो चुनौति थियो । अर्को तर्फ कोभिड-१९ को कारण लामो समय सम्म नसोचेको कठिनाई भोग्नु पर्यो ।
त्यस्तो प्रतिकूल परिस्थितिको बावजुद नियमक निकाय, संचालक समिति, कर्मचारी र अभिकर्ताहरूको सहयोग र प्रयासले कम्पनीले २ बर्षको अवधिमा ६२ वटा शाखा र उपशाखा स्थापना, १६१९० अभिकर्तालाई तालिम, ९ वटा प्रोडक्ट लंच, १६५ करोड रुपैयाँ बीमा शुल्क संकलन र २५६ करोड रुपैयाँ लगानी गर्न सफल भएको छ ।स्थापनाको १ वर्षपछि नै कोरोना महामारीको कारण लक्ष्य अनुसार शाखा संजाल विस्तार, निरन्तर अभिकर्ता तालिम संचालन र व्यवसाय वृद्धि गर्न नसकेतापनि कम्पनीले आर्थिक वर्ष २०७५/७६ को पोलिसि बोनस न्यूनतम रु ५०/- ल्याई नयाँ कम्पनीहरू मध्येमा उत्कृष्ट नतिजा ल्याउन सफल भएको कम्पनीले जानकारी दिएको छ ।
नेपालमा बीमा कारोवार प्रतिको आमजनताको विश्वास वृद्धि गर्न कम्पनिले मितव्ययी तरिकाले ग्रामिण क्षेत्रमा बीमाको पहुच अझै विस्तार गर्ने, गुणात्मक कारोबारलाई जोड दिने, व्यवसायीक अभिकर्ता निर्माण गर्ने र प्रत्येक घरमा एउटा बीमा पुर्याउने लक्ष्य लिएर काम गर्ने भएको छ । कम्पनीले दोस्रो वार्षिक उत्सवको अवसर पारेर आजकै मितिबाट बिक्री गर्ने गरी नँया मनि ब्याक बीमा योजना ‘महालक्ष्मी धनधान्य’ पोलिसी सञ्चालनमा ल्याएको छ । आर्थिक वर्ष २०७६/७७ को वासलात नाफा नोक्सान हिसाब बीमा समितिबाट स्वीकृती पछी ६० करोड रुपैयाँको सेयर सर्वसाधारणमा जारी गर्ने गरी प्रकृया सुरू गरेको व्यहोरा पनि जानकारी गराएको छ ।
