• अर्थ सरोकार सम्बाददाता 

काठमाडौँ । नेपाल राष्ट्र बैंकका २ विभागको स्थानान्तरण गरिएको छ । राष्ट्र बैंकले एक सूचना प्रकाशित गरी विकास बैंक सुपरिवेक्षण विभाग र आन्तरिक लेखा परीक्षण विभाग चैत ३१ गते ललितपुरको पुल्चोकबाट बालुवाटारमा स्थानान्तरण भएको जानकारी गराएको हो । 

‘यसअघि ललितपुरको पुल्चोकस्थित राष्ट्रिय सहकारी विकास बोर्डमा रहेका विकास बैंक सुपरिवेक्षण विभाग र आन्तरिक लेखा परीक्षण विभाग बालुवाटारस्थित राष्ट्र बैंकको केन्द्रीय कार्यालयमा स्थानान्तरण गरिएका छन् । अब सर्वसाधारण, सेवाग्राही, बैंक तथा वित्तीय संस्था तथा सरोकारवाला निकायहरुको दुवै विभागका सम्पूर्ण काम बालुवाटारस्थित राष्ट्र बैंकको केन्द्रीय कार्यालयबाटै हुनेछन् ।’ सूचनामा उल्लेख छ ।