• अर्थ सरोकार सम्बाददाता 

काठमाडौँ । पछिल्लो साता वाणिज्य बैंकहरुमा निक्षेप संकलन ह्वात्तै बढेको छ । नेपाल बैंकर्स संघले आइतबार सार्वजनिक गरेको तथ्यांक अनुसार चैत तेस्रो साता २७ वाणिज्य बैंकमा ४० अर्ब रुपैयाँ निक्षेप थपिएको छ ।संघका अनुसार चैत २० गतेसम्ममा वाणिज्य बैंकमा ४० अर्ब रुपैयाँ निक्षेप थपिँदा कुल निक्षेप ३८ खर्ब ९० अर्ब रुपैयाँ पुगेको छ । अघिल्लो साता १० अर्बले निक्षेप बढ्दा कुल निक्षेप संकलन ३८ खर्ब ५० अर्ब रुपैयाँ पुगेको थियो ।

सरकारले विकास खर्च धेरै गर्ने समय नजिकिँदै गरेकाले निक्षेप थप बढ्ने र बजारमा अधिक तरलता हुने बैंकरहरु बताउँछन् । यस्तै यो अवधिमा बैंकहरुले ३९ अर्ब कर्जा लगानी गरेका छन् । योसंगै वाणिज्य बैंकहरूले कुल ३५ खर्ब १ अर्ब रुपैयाँ कर्जा लगानी गरेका छन् । चैत दोस्रो साता २८ अर्बले कर्जा प्रवाह थपिँदा बैंकहरुले कुल ३४ खर्ब ६२ अर्ब रुपैयाँ लगानी गरेका थिए ।