- अर्थ सरोकार सुदूरपश्चिम ब्युरो
धनगढी । कोरोना भाइरसको दोस्रो लहर सूरु भएसँगै सुदूरपश्चिममा जोखिम त्यत्तिकै मात्रामा बढेको छ । आइतबार मात्रै धनगढीमा रहेको अस्थायी कोरोना अस्पतालमा उपचाररत एक पुरुषको मृत्यु भएको छ । जिल्लाको गोदावरी नगरपालिका वडा नं. ३ का ६२ वर्षीय पुरुषको मृत्यु भएको सेती प्रादेशिक अस्पतालका सूचना अधिकारी दिलीप कुमार क्षेष्ठले जानकारी दिए ।
वैशाख ८ गते अस्पताल भर्ना भएका उनीमा ९ गते कोरोना पुष्टि भएको थियो । आइसियुमा राखेर उपचार भइरहेका उनमा कडा खालको स्वासप्रस्वासको समस्या देखिएको थियो । यता अस्पतालमा थप बिरामी राख्नका लागि बेड अभाव भएको अधिकारी श्रेष्ठले बताए । उनले भने, ‘हामीसँग भएका सबै बेड भरिसकेको छ, जटिल प्रकृतिका बिरामी आए भने फर्काउनुको अरु कुनै विकल्प छैन ।’
