• अर्थ सरोकार सम्बाददाता

काठमाडौँ । कोभिड–१९ संकट व्यवस्थापन केन्द्र (सीसीएमसी) ले वैशाख मसान्तसम्म देशव्यापी लकडाउन गर्न सरकारसमक्ष सिफारिस गरेको छ । नेपालमा बढ्दो कोरोनाको दोस्रो लहरले अवस्था भयावह बन्न सक्ने भन्दै वैशाख मसान्तसम्म लकडाउन गर्न सिफारिस गरेको हो । बैठकले देशव्यापी लकडाउनमा नजाने भए निषेधाज्ञामा जान पनि सुझाव दिएको छ ।

सीसीएमसीका सचिव डा.खगराज बरालले कोरोनाको दोस्रो लहरले अवस्था भयावह बन्न सक्ने आँकलन गर्दै सरकारलाई कम्तिमा ३ साताका लागि देशव्यापी लकडाउन गर्न बैठकले सिफारिस गरेको र प्रस्ताव आज मन्त्रीपरिषदमा पेस हुने बताएका छन् ।

यस्तै बैठकले शहरी क्षेत्रमा ५ सय सक्रिय संक्रमित नाघे निषेधाज्ञा गर्न सक्ने अधिकार जिल्लालाई दिन सिफारिस गरिएको बरालले बताए । जिल्लामा रहेको जिल्ला कोभिड–१९ संकट व्यवस्थापन केन्द्र (डीसीसीएमसी) मार्फत निर्णय गर्ने गरी प्रमुख जिल्ला अधिकारीलाई निषेधाज्ञाको अधिकार दिन लागिएको उनको भनाइ छ ।