">
- अर्थ सरोकार सम्बाददाता
काठमाडौँ । काठमाडौं उपत्यकाका तीन वटै जिल्ला प्रशासन कार्यालयहरुले वैशाख १६ गतेदेखि सार्वजनिक यातायात बन्द गरेर निषेधाज्ञा लगाउने निर्णय गरेका छन् । आज सोमबार काठमाडौँ उपत्यकाका तीन वटै जिल्लाका प्रमुख जिल्ला अधिकारीले अत्यावश्यकबाहेकका सेवा बन्द गरेर १६ गते राति १२ बजेदेखि लागु हुनेगरी निषेधाज्ञा लगाउन सरकारलाई सिफारिस गरेको हुन् ।
उक्त बैठकले सार्वजनिक विमानलाई सुचारु हुन दिने र यातायात सेवालाई बन्द गरेर निषेधाज्ञा लगाउन सरकारलाई सिफारिस गरेको छ । यता यातायात व्यवसायीहरुले विमानलाई चल्न दिएर सार्वजनिक सवारी मात्रै बन्द गर्ने गरी निर्णय भएमा अवज्ञा गर्ने चेतावनी दिएका छन् । जिल्ला प्रशासन कार्यालयहरुले गरेको सार्वजनिक यातायात बन्द गर्ने निर्णयमा दोहोरो नीति देखिएपछि यातायात व्यवसायीले असन्तुष्टि जनाएका हुन् ।
सवारीसाधनलाई रोक्दै विमान चलाएर महामारी नरोकिने नेपाल यातायात व्यवसायी राष्ट्रिय महासंघका महासचिव सरोज सिटौलाले बताए । ‘हाम्रो व्यवसायलाई विभेद गरियो, विमानलाई संचालनको अनुमति दिने तर हामीलाई बन्द गर्न सिफारिस गर्ने यसरी कसरी कोरोना रोकिन्छ ? ‘उनले भने । सरकारले दोहोरो खालको निर्णय लिएमा आफूहरुले सरकारी निर्णयको अवज्ञा गर्ने पनि उनले बताए ।
