• अर्थ सरोकार सुदूरपश्चिम ब्युरो

धनगढी । यतिबेला देश कोरोना माहामारीको चपेटाबाट गुज्रिरहेको छ । यहि बेलामा बढ्दो संक्रमितको संख्यासँगै अस्पतालहरुमा बेड तथा अक्सिजनको चरम अभाव भएको छ । यहीबीच अक्सिजनको कालोबजारी गरेको भन्ने सूचनाको आधारमा धनगढीको अमित मेडिसिन डिस्ट्रिब्युटर्सको गोदाममा छापा हानिएको छ । छामा हान्ने दौरानमा गोदाममा भरिएका ५० र खाली ११ गरी ६१ सिलिन्डर भेटिएको छ । धनगढीको अमित मेडिसिन डिस्टीब्युटर्सले सिलिन्डर लुकाएको सूचना पाएपछि प्रशासनको टोलीले बुधबार गोदाममा छापा मारेको हो ।

अमित मेडिसिन डिस्ट्रिब्युटर्स नजिकै रहेको निजी अस्पतालमा उपचाररत एक बिरामीका आफन्तले दिएको सूचनाका आधारमा गोदाममा छापा हानेका जिल्ला प्रशासन कार्यालय कैलालीका प्रमुख जिल्ला अधिकारी खगेन्द्रप्रसाद रिजालले बताए । उनले भने, ‘यस्तो माहामारीको बेलामा लुट लुट गर्नेलाई छुट हुँदैन ।’

बुधबारसम्म ६ सय ५० सिलिन्डर लुकाएको गुनासो आएको थियो । बिहान छापा हान्दा ६१ मात्रै फेला परेको बताउँदै बाणिज्य कार्यालय कैलालीका प्रमुख कमल पुनले कागजात हेर्दा बिक्री गरेको, चलान गरेको कुनै पनि रेकर्ड नभेटिएको बताए । उनले भने, ‘अमित मेडिसिनका सञ्चालक दुश्यन्त बस्नेतले कुनै पनि कागजात पेस गरेका छैनन् ।’ अनुगमन टोलीले साउनयता सिलिन्डर किनेको, बिक्रि गरेको विल, चलानसहितका कागजात ३ दिनभीत्र पेश गर्न बन्नेतलाई निर्देशन दिएको छ ।

बस्नेतले डल्केबर ग्यास उद्योगबाट केही दिनयता २ सय ५० सिलिन्डर किनेको स्वीकार गरेका छन । उनले २५ हजारका दरले किनिएका अक्सिजन भरिएका सिलिन्डर बजारमा ४० हजारमा बिक्री गरिरहेको खुलेको छ । डडेलधुराको अमरगढी नगरपालिकालाई उनले ४० हजारमा सिलिन्डर जति पनि किन्न सकिने बताएको स्रोतले जनाएको छ । बस्नेतले आफुले सरकारी अस्पताललाई सिलिन्डर सप्लाई गर्ने गरेकाले यती मात्रामा गोदाममा राखेको जनाएका छन् । उनले भने, ‘म अक्सिजनका सिलिन्डर पनि विक्रि गर्छु, त्यसैका लागि मगाएको हुँ ।’