काठमाडौँ । पछिल्लो एक साता यता बैंक तथा वित्तीय संस्थाबाट ठुलो परिमाणमा रकम झिकिएको पाइएको छ । बैंकमा गएरमात्र होइन एटिएम मार्फत पनि निकै ठुलो परिमाणमा रकम झिकिएको पाइएको छ । विशेषगरी पछिल्लो एक सातामा सार्है अचम्मलाग्दो गरी ग्राहकले बैंकबाट पैसा झिकिरहेका छन् ।

‘एक साता यता पैसा झिक्नेहरुको चाप ठुलो छ । त्यसमा पनि पछिल्लो ३ दिन यता त पैसा निकै नै धेरै झिकिएको छ ।’ एनआइसी एशिया बैंक लिमिटेडका एक शाखा प्रबन्धकले भने, ‘हाम्रो शाखामा मात्र होइन देशभर खुलेका शाखाहरुमा रकम झिक्नेहरु बढेका छन् । र हाम्रो बैंकमा मात्र होइन सबैजसो बैंकमा रकम राख्ने निकै कम र झिक्ने सार्है बढी भएका छन् ।’ उनका अनुसार यसअघिको लकडाउनमा यसरी पैसा झिकिएको थिएन । किन झिकियो त यसरी पैसा ? कोरोनाको त्रास, उपचार खर्चको जोहो वा कारण अरु केहि ? हाम्रो प्रश्नमा बैंकका कर्मचारी भन्छन्- ‘पहिलाको लकडाउनमा यस्तो थिएन । अहिले त सार्है नै भैसक्यो । कोरोना भाइरसको संक्रमण दैनिक ७ हजार माथि पुगेपछि उपचारका लागि भन्दै यसरी रकम झिकिएको हुनसक्छ ।’