• अर्थ सरोकार सम्बाददाता 

काठमाडौं । मध्य भोटेकोशी जलविद्युत कम्पनीले स्थानीयलाई जारी गरेको आइपीओमा अनलाइनबाट पनि आवेदन दिन सकिने भएको छ । बिक्री प्रबन्धक ग्लोबल आइएमई क्यापिटलले आयोजना प्रभावित स्थानीयले पनि अनलाइनबाट आवेदन दिन पाउने व्यवस्था मिलाएको हो । सिन्धुपाल्चोकका आयोजना प्रभावित स्थानीयले http://onlinedemat.globalimecapital.com/shareapply बाट अनलाइनमार्फत आवेदन दिन सक्नेछन् ।

मध्य भोटेकोशीले मंगलबारदेखि सिन्धुपाल्चोक जिल्लाका आयोजना प्रभावितका लागि कुल ६० लाख कित्ता आइपीओ निष्कासन गरेको हो । कम्पनीले कुल ६० लाख कित्ता आइपीओमध्ये ३०% ले हुने १८ लाख कित्ता सेयर भोटेकोशी गाउँपालिका वडा नम्बर १ र ५ (साविकको लिस्ती र मार्मिंग गाविस) र बाह्रबिसे नगरपालिका वडा नम्बर ५,६,७ र ८ (साविकको गाती, घुम्पांग र मानेश्वरा गाविस) का स्थानीयलाई छुट्याइएको छ । 

यस्तै ७०% ले हुन आउने ४२ लाख कित्ता सेयर सन्धुपाल्चोक जिल्लाका अन्य क्षेत्रका स्थानीयवासीको लागि छुट्याईएको छ । १०० रुपैयाँमा यसमा छिटोमा जेठ ४ गतेसम्म आवेदन दिन सकिनेछ । उक्त समयमा सबै सेयर बिक्री नभएमा जेठ २० गतेसम्म भर्न सक्नेछ । स्थानीयले प्रतिकित्ता १०० रुपैयाँमा आइपीओ भर्न सक्नेछन् ।