• अर्थ सरोकार सम्बाददाता

काठमाडौं । कालीमाटी तरकारी तथा फलफूल बजारमा जोरबिजोर प्रणाली लागू गरिएको छ । निषेधाज्ञाका समयमा पनि भिडभाड बढेको कारण कालीमाटी तरकारी तथा फलफूल बजारमा जोरबिजोर प्रणाली लागू गरिएको हो । उक्त तरकारी तथा फलफूल बजारमा तरकारी बजार विकास समितिले गत सोमबारदेखि चारपाङ्ग्रे सवारी साधनमा जोरबिजोर प्रणाली लागू गरेको हो ।

उक्त तरकारी तथा फलफूल बजार बिहान १ बजेदेखि ९ बजेसम्म खुल्ला हुँदै आएको छ । बजारमा धेरै भिड बढेपछि समितिले जोर दिनमा जोर नम्बरका रबिजोर दिनमा बिजोर नम्बरका सवारी साधनलाई मात्र बजारमा प्रवेश गर्न अनुमति दिने भएको छ ।

तरकारी लिन जाने गाडी बिहान ८ बजेभित्र पुगिसक्नु पर्ने नियम बनाएको पनि समितिले जानकारी दिएको छ । थोक बजारमा अहिले झण्डै ४०० जना व्यापारीले व्यापार गर्दै आएका छन् । निषेधाज्ञा हुनु अगाडि दैनिक ९०० टनसम्म तरकारी आउने गरेकोमा अहिले दैनिक साढे ५०० टनको हाराहारीमा तरकारी भित्रिरहेकाले तरकारीको अभाव नहुने पनि समितिले जनाएको छ ।