चितवन । लायन्स क्लब ईन्टरनेशनल ३२५ बी टु एरिया नं.३ कोभिड दोस्रो लहरसँगै यस विरुद्धको अभियानमा जुट्दै आएको छ । क्लबले ३५ लाख बराबरका स्वास्थ्य सामग्री खरिद गरी विभिन्न स्वास्थ्य संस्थालाई हस्तान्तरण गरेको छ । हालसम्म यस अभियानका लागि ५२ लाख जुटिसकेको छ । क्लबले शुक्रबार जिल्लाका तीन वटा अस्पताललाई स्वास्थ्य सामग्री हस्तान्तरण गरेको छ ।
क्लबले भरतपुर अस्पताललाई दुई थान र विपी कोईराला मेमोरियल क्यान्सर अस्पताललाई एक थान अक्सिजन हाइफ्लो मेसिन र बकुलहर रत्ननगर अस्पताललाई दुई थान अक्सिजन कन्सन्ट्रेटर सहयोग गरेको छ । ती सामग्री क्लबका ईलेक्ट गभर्नर रामप्रसाद भट्टको नेतृत्वको टोलीले तीन वटै अस्पतालमा पुगेर हस्तान्तरण गरेको हो ।भरतपुर अस्पतालमा आयोजित कार्यक्रममा गभर्नर भट्टले अस्पताल विकास समितिका अध्यक्ष डा.भोजराज अधिकारीलाई सामग्री हस्तान्तरण गर्नुभयो ।
यसैगरी क्लबको सोही टिमले क्यान्सर अस्पतालमा कार्यकारी निर्देशक डा. देजकुमार गौतम र उपनिर्देशक डा.कृष्णसागर शर्मालाई सामग्री हस्तान्तरण गरेको छ । यस्तै बकुलहरमा व्यवस्थापन समितिका अध्यक्ष गोपाल कर्माचार्य र डा.निश्चल मास्केलाई सामग्री हस्तान्तरण गरेको छ । गभर्नर भट्टले बेलायतबाट भरतकुमार श्रेष्ठको नेतृत्वमा १४ लाख ३३ हजार ७३० र अमेरिकाबाट सुप्रिया श्रेष्ठको नेतृत्वमा ७ लाख ४४ हजार ७३९ गरी २१ लाख ७८ हजार ४६६ लायन्सलाई सहयोग प्राप्त भएको जानकारी दिनुभयो । अन्य रकम क्लब र लायन्सबाट सङ्कलन गरिएको हो ।
क्लबले सिद्धार्थलाल चुकेको नेतृत्वमा कोभिड प्रोटेक्सन डिष्ट्रिक कोर्डिनेटर समिति निर्माण गरी सहयोग सङ्कलन र सामग्री खरिद गरी वितरण गर्दै आएको छ । क्लब तथा लायन्सहरुबाट कोभिड अभियान जारी छ । यस अघि १८ लाख बराबरका स्वास्थ्य सामग्री खरिद गरी भरतपुर, क्यान्सर र मध्यविन्दु अस्पताल कावासोतीलाई उपलब्ध गराईसकिएको छ । यस्तै इच्छाकामना गाउँपालिकालाई मनिटर र अक्सिजन कन्सनट्रेटर सहयोग गरेको छ ।
लायन्सले कालिबाहादुर गण भरतपुरलाई एक महिनाका लागि शववाहनसमेत उपलब्ध गराईसकेको छ । उक्त शव वाहनमा शव निःशुल्क गन्तव्यमा पुर्याईदै आएको छ । कोर्डिनेटर चुकेका अनुसार सङकलित र सङकलन भईरहेको रकमबाट अन्य अस्पताललाई आवश्यकताअनुसार सहयोग गरिने छ । कोरोनाको पहिलो लहरमा पनि यहाँका लायन्सहरुले ठूलो सहयोग पुर्याएको भरतपुर अस्पताल विकास समितिका अध्यक्ष डा।भोजराज अधिकारीले बताउनुभयो । -रासस
