• अर्थ सरोकार सम्बाददाता

काठमाडौं । समाज लघुवित्त र स्वस्तिक लघुवित्तले वार्षिक साधारणसभा बोलाएका छन् । यी दुई कम्पनीले एकैदिन जेठ ११ गते वार्षिक साधारण सभा बोलाएका हुन् । समाज लघुवित्तको सभा मलंगवाको जानकी फेमली होटेलमा दिउसो २ बजे सुरु हुने भएको छ भने स्वस्तिक लघुवित्तको पनि दिउसो २ बजेनै लहानको होटेल नेमानमा सुरु हुने भएको छ । सभामा दुवै कम्पनीले एक आपसमा मर्ज हुने एजेन्डा पेश गर्ने भएका छन् ।

समाज र स्वस्तिक लघुवित्त १ः१ को स्वाप रेसियोमा मर्ज हुन लागेका हुन् । सभामा मर्जपछि कम्पनीको नाम स्वस्तिक समाज लघुवित्त राखिने एजेण्डा पनि रहेको छ । यस्तैगरी मर्ज पश्चात कम्पनीको जारी पुँजी, चुक्ता पुँजी बृद्धि हुने भएकोले सोही अनुसार नियमावली संसोधन गर्ने विषय पनि छ । कम्पनी मर्ज भएपछि कम्पनीको केन्द्रिय कार्यालय सिरहाको लहानमा राख्ने एजेन्डा पनि रहेको छ ।

दुवै कम्पनीबीच गत असोज ५ गते एक आपसमा मर्ज हुने सम्झौता भएको थियो । हाल समाज लघुवित्तको सर्लाही र स्वस्तिक लघुवित्तको सिराहामा केन्द्रिय कार्यालय रहेको छ । समाज लघुवित्तले आइपीओ जारी गरिसकेको छ । स्वस्तिक लघुवित्तले भने आइपीओ जारी गरेको छैन ।