×

Live on

रेडियो अर्थ सरोकार

Listen to live radio.

बहराइनको राम्रो जागिर छाडेर गाउँमै व्यावसायिक पशुपालनतर्फ रमाउँदै अधिकारी

GLOBAL IME BANK

बहराइनको राम्रो जागिर छाडेर गाउँमै व्यावसायिक पशुपालनतर्फ रमाउँदै अधिकारी

२९ बैशाख २०७८, बुधबार

पढ्न लाग्ने समय: १ मिनेटभन्दा कम

तनहुँ । भानु नगरपालिका-१२ स्थित घलेछाप निवासी ५० वर्षीय राजेन्द्र अधिकारी बहराइनमा होटलको राम्रो जागिर छाडेर गाउँमै व्यावसायिक पशुपालनतर्फ लाग्नुभएको छ । गाउँमै बसेर केही गरौँ भन्ने भावनाका साथ विगत ३ वर्षदेखि बोर र स्थानीय जातका बाख्रा, मौरीपाल तथा लोकल कुखुरा पालन गरेर राम्रो आम्दानी गर्दै आउनुभएको छ । सुरुमा करिब १५ लाखबाट व्यवसाय थाल्नुभएका अधिकारीले अहिले करिब ७० लाख लगानी भइसकेको बताउनुभयो । हाल उहाँका खोरमा ११७ वटा बाख्रा छन् । मिर्लुङ्ग बहुउद्देश्यीय कृषिफार्म प्रालि दर्ता गरी किसान अधिकारीले भैँसीपालन तथा तरकारी खेतीसमेत गर्ने योजना बनाउनुभएको छ । बोर जातको उन्नत बोकाबाट स्थानीय जातको बाख्रामा क्रस गराएर ब्याडका रूपमा बोका उत्पादन गरी बिक्री गर्दै आएको उहाँ बताउनुहुन्छ ।
पाठो पाएपछि कम्तीमा तीन महिनापछि प्रतिकिलो ८०० मा बिक्री गर्ने गरेको उहाँले बताउनुभयो । ब्याड बोकाको माग राम्रो रहेकाले पुर्याउन धौधौ हुने गरेको छ । उहाँले भन्नुभयो, ‘बोर जातको बाख्रा मासुका लागि छिटो बढ्ने हुँदा यसतर्फ किसानको आर्कषण बढ्दै गएको पाइन्छ ।’ स्थानीय जातको बाख्राको तुलनामा बोर जातको बाख्राको मासु दोब्बरले उत्पादन वृद्धि हुने हुँदा किसानले छोटो अवधिमा राम्रो मूल्य पाउन सक्नेछन् । शुरुशुरुमा प्रतिकिलो १ हजार १ सय रुपैयाँसम्म बिक्री गर्ने गरिए पनि अहिले ८/९ सय रुपैयाँमा बिक्री गर्दै आएको किसान अधिकारी बताउनुहुन्छ । ३ महिनाको पाठापाठी १५ किलोभन्दा माथिका हुन्छन् । दूध छुटेपछि पनि करिब २० दिन पालेपछि बिक्री गर्न लायकका हुन्छन् ।
सुरुमा बन्दीपु र, नुवाकोटबाट ब्याड बोका ल्याइए पनि अहिले आफैँले उत्पादन गरेको र रुकुम, स्याङ्जा, लमजुङ, चितवनलगायतका स्थानमा किसानले किनेर लैजाने गरेका छन् । बोर जातको बाख्रामा रोगसँग लड्न सक्ने क्षमता बढी हुने, पाल्न सजिलो हुने र छिटो वृद्धि हुने भएकाले किसानको यसतर्फ आर्कषण बढ्न थालेको हो । नेपालमा भन्दा बहराइनमा धेरै गुणा राम्रो आम्दानी रहे पनि स्वदेशमा बसेर स्वतन्त्र तरिकाले काम गर्ने चाहना भएकाले आफूले पशुपालन तथा कृषि पेशा अँगालेको उहाँले बताउनुभयो । आफ्नो र भाडामा गरी १२२ रोपनी क्षेत्रफलमा फार्म स्थापना गरिएको र करिब ३० रोपनी क्षेत्रफलमा विभिन्न जातका घाँस लगाइएको किसान अधिकारी बताउनुहुन्छ । फार्ममा अधिकारी परिवारसहित अन्य ३ कामदारले काम गर्दै आएका छन् । -रासस
Hamro Parto AD
NMB BANK
TRITON COLLEGE

प्रतिक्रिया दिनुहोस्

सिफारिस: