• अर्थ सरोकार सम्बाददाता 

काठमाडौँ । नेपाल धितोपत्र बोर्डले दश महिनामा कुल ४० अर्ब ४३ करोड रुपैयाँ बराबरको धितोपत्र निष्काशन गर्न अनुमति दिएको छ । बोर्डले २०७८ वैशाख मसान्तसम्ममा १७ अर्ब ५४ करोड बराबरको डिबेन्चर, १३ अर्ब ३४ करोड रुपैयाँ बराबरको साधारण शेयर, ६ अर्ब ५० करोड रुपैयाँ बराबरको म्युचुअल फण्ड र ३ अर्ब ५ करोड बराबरको हकप्रद सेयर गरी कुल ४० अर्ब ४३ करोड रुपैयाँ बराबरको धितोपत्र निष्काशनका लागि सम्बन्धित कम्पनीहरुलाई निष्काशनका लागि अनुमति दिएको नेपाल राष्ट्र बैंक तथ्याङ्कमा उल्लेख छ । 

यता यस अवधिमा नेप्सेमा ३ खर्ब २७ अर्ब ४० करोड रुपैयाँ बराबरको धितोपत्र सूचिकृत भएको छ । जसमध्ये २ खर्ब १९ अर्ब ९५ करोड रुपैयाँ बराबरको विकास ऋणपत्र रहेको छ भने ३ अर्ब २० करोड रुपैयाँ बराबरको बोनस शेयर, ४१ अर्ब ३३ करोड बराबरको आईपीओ र १४ अर्ब ५५ करोड बराबरको डिबेन्चर नेप्सेमा सूचिकृत  भएको छ । 

यस्तै चालु आवको दश महिनामा ५ अर्ब ५२ करोड बराबरको हकप्रद सेयर र २ अर्ब ८५ करोड बराबरको म्युचुअल फण्डको इकाई सूचिकृत भएको हो । नेप्सेमा २०७८ बैशाखसम्ममा सूचीकृत ५ अर्ब ७० करोड कित्ता शेयरको चुक्ता मूल्य ५ खर्ब ६० अर्ब ८८ करोड रुपैयाँ रहेको छ । वैशाखसम्म नेप्सेमा सूचिकृत कम्पनीहरूको संख्या २२० पुगेको छ ।